Antonio Matrone
Caro, Maurizio qualche settimana fa, sono andato sul Faito, insieme all’amico naturalista Ferdinando Fontanella. In quella occasione abbiamo visitato i faggi secolari con le neviere. S’è creata una bellissima atmosfera che mi ha indotto a scrivere una poesia sul “nonno Faggio”, una mia vecchia conoscenza. Ti chiedo la cortesia di pubblicarla sul tuo sito alla voce dei poeti stabiesi, perchè sono sicuro che piacerà a tutti gli amanti della natura. Grazie di cuore e complimenti per il tuo bellissimo sito. Ciao, Antonio Matrone (C.mare, giugno 2010)
Nonno “Faggio”
A Castellammare, ‘ncopp’ ‘a muntagna d’‘o Faito,
ce tengo nu parente, che m’è caro assaje.
Appena l’aggio visto, so’ rimasto sbalordito:
“Pecché me chiamma, che va truvanno maje?”
Nun è persona canusciuta, ma n’ albero affatato,
Ca, pe’ caso, l’aggio ‘ncuntrato ‘na matina ‘e maggio.
Comme nu familiare, me l’aggio subbito abbracciato,
ed essendo viecchio assaje, è diventato “nonno Faggio”.
Dint’‘o bosco e vicino ‘a fossa, addò ‘nce steva ‘a neva,
qualcuno dice che so’ tre secule, c’hanno piantato là.
Cu tanti foglie, ‘o sole nun passava e ‘o frisco ‘a manteneva,
e mò, co’ progresso, se sente inutile e nun sape c’hadda fà.
Ma ce stong’io, che d’‘a muntagna, so’ tanto annammurato,
c’ogne mese saglio, e ‘o vaco a fa nu poco ‘e cumpagnia.
E ammiezo a stu bosco verde, ce parlammo uno cu n’ato,
po’ chianu, chiano, me rilascio, e passa tutt’‘a frenesia.
Pirciò ringrazio a Dio, che so’ accussì sensibbile,
E prego, cu tutt’‘o core, ca’ nisciuno ‘o va a taglià.
All’ombra ‘e stu gigante, pare assaje incredibbile,
me gira ‘o munno attuorno e… nun ce sto’ a penzà.
* * *
Ciao, Maurizio, ti invio una mia poesia, spero che ti piaccia e che possa essere pubblicata sul sito degli stabiesi doc. Saluti carissimi e ancora complimenti per il sito. Antonio Matrone.
‘O pudismo staggiunale
Ogn’anno, comme vene ‘a primmavera,
scenne a correre tutt’‘a guagliunera.
E annanze e arrete ‘ncopp’‘o lungomare,
sfilane ‘e chiattulelle ‘e Castiellammare.
Chi in tuta, chi in pantaluncine,
vonno dimagrì’ sti signurine.
Ma pure si ll’abbigliamento è fatto ad arte,
se vede ch’esce ‘o grasso ‘a tutte parte.
Hanno magnato fino a mo,
sciù, bignè e roccocò.
‘Nu passo a ppère, manco pe cumbinazione,
hanno guardato ‘o sport, sulo pe televisione.
E mo hanno stabilito, ca dint’a ‘nu par’‘e mise,
s’hanno ‘a truvà’ dimagrite ‘e sette chile ‘e piso.
Ma sentite a me, che so’ ‘nu veterano,
e tengo ‘o fisico bello, asciutto e sano.
Me sceto ampressa, all’orario d’‘e galline,
e vaco a correre quase ogne matina.
Me faccio doje ore ‘e corsa o suppergiù,
pe me magnà’ ‘nu piatto ‘e pasta c’‘o raù.
Si po’ veco ca me sta criscenno ‘a panza,
riduco ‘e calurie e aumento la distanza.
Corro e me votto a mare pure a Capodanno,
pe stà’ gagliardo e tuosto tutto ll’anno.
Pirciò, signurine mie belle,
nun ve magnat’‘e briosce c’‘a nutella.
E si a mare ‘o fisico avit’‘a sfuggià’,
penzatece pe tiempe, si no, lassate stà’ !
