Scennènno ‘e notte di Francesco Palmieri

Scennènno ‘e notte

     ( di Francesco Palmieri – da   “Suonne e ricordeˮ )

Via Visanola - Foto Enzo Cesarano

foto Enzo Cesarano

Scennènno ’e  notte, p’ accurciatoia

da ’o Castiello pe’ Visanola,

dint’  ’o cerviello mio

se songhe affullate

’e cchiù ddoce ricorde;

e comme dint’ a nu specchio magico

me so’ visto guaglione.

Me so’  truvato ’ncopp’ a stu Castiello

comme  ’ntiempo passato: guagliunciello.

Me so’  venute ’e brivide int’  ’o core,

truvanneme guaglione c’ ’o penziero.

 

Scennènno ’e grariatelle, dint’ ’o scuro,

m’ aggio goduto ll’ aria prufumata,

ma nu ‟sennuzzoˮ senza puté  chiagnere

m’ ha fatto arricurdà tutt’ ’o passato!

 

E specialmente po’  quanno aggio visto

attuorno a me migliare ’e lucelùce

tra ll’ èvere e ’a muntagna, ’mmiez’ ’o vverde,

comme  stellucce, ‟simbolo di pace!ˮ

 

Aggio guardato ’o palazziello antico,

addό so’  stato ’e casa pe’  tant’ anne…

e m’ è venuta â mmente ’a voce ’e mamma,

ca me chiammava quase tutt’ ’e ssere.

 

Assieme â casa mia, aggio guardato

’e nnave, ’o mare e stu cantiere antico…

’a luna chiena tutto ha rischiarato:

feneste, balcuncielle, strade e vviche.

 

Me so’  fermato ’nnanze a la Madonna

’e Sant’Amore e ll’ aggi’ assaje pregata:

– Tu ca sì stata «’a Mamma d’ ’o dulore»

lìberame ’a tutt’ ’e ’nfamità!

  

So’  stato ’o figlio tujo pe’ tant’anne

e nun m’ abbandunà  quanno te chiammo.

Fedele è stato sempe stu rione:

te festeggiava ’nzieme a nuie, guagliune! –

 

E cchiù te guardo, cchiù me vene â mmente

guardanno a tte, Madonna mia bella,

veco ’e pregà ’a zia vicchiarella

dicenne ’e ccose ’e Ddio, tutta cuntenta.

 

Quanta ricorde ’e stu quartiere mio,

me sento dint’ a ll’anema na gioia…

me pare ’e turnà ancora nu guaglione

comm’  a na vota ’e tantu tiempo fa!


Le composizioni di Francesco Palmieri

                                                                      

About 

Collaboratore di Redazione
Autore di teatro e autore radiofonico; filmaker, narratore. E' laureato in Scienze della Comunicazione, indirizzo Sociologia delle Comunicazioni. E' laureato in Comunicazione d'Impresa e Comunicazione Pubblica; con specializzazione in Comunicazione Politica. E' responsabile della sezione Video di LR.

Lascia un commento

Il tuo indirizzo email non sarà pubblicato. I campi obbligatori sono contrassegnati *