‘E tterme ’e Castiellammare
di Giuseppe Caputo

‘E tterme ’e Castiellammare (cartolina d’epoca)

Si venite a cchesti tterme,
che delizia ca ce sta!
Stanno tanti ffuntanelle
e ogni cura se pò ffà.
Ce sta l’acqua d’’a Madonna,
ca fa subit’urina;
chi se veve ’a Stabia e ’a Media,
corre ampressa a gghì a ”sfratta’.
Certo, ognuno resta lieggio
e ringrazia ’sta città.

Ma si po’ state nervuse,
nun c’è collera ’a piglià:
l’acque so’ miraculose,
songh’adatte pe’ calmà.
Cu ’a giarretta chiena ’mmano,
comm’ è bello a ppassiggià!
L’aria fina, ossigenata,
ve fa meglio respirà.
’E ssurgente so’ vintotto,
so ’na vera rarità.

‘E tterme ’e Castiellammare (cartolina d’epoca)

Si girate tutt’ ’o munno,
n’e ttruvate comm ’a cca.
Vene gente pure ’a fora,
cu’ ’a certezza ’e se sanà.
Si trasite dint’ ’e tterme,
n ’e vvulite lassà cchiù
e sentite dint’ ’o core
’na carezza ’e giuvuntù!