chiacchiere e marciappiere

Chiacchiere ‘e marciappiere

Chiacchiere ‘e marciappiere
( scritti dialettali dello stabiese Ciro Alminni )

‘Ntiemp”e ‘uèrra
( I parte )

chiacchiere e marciappiere

Chiacchiere e marciappiere

Quatte chiacchiere, jènne ‘n’nanze e arrete ‘ngoppa a stu bellu marciappière, e ‘cu sta bella jurnata ‘e sole: ce scarfamme, cammenamme e ce cuntamme cocche sturièlla… ‘o necessarie ca passe ‘a mèza jurnate ‘ncumpagnie cu ll’amice, primme ‘e jì a magnà, dico buòne guagliù?
– Sì, …rice buòne Giritiè, e a proposito ‘e storielle, comme l’he viste ‘o festivallo ‘e San Remo e ‘o Principe Filiberto?…
– Guagliù, onestamente, a me ‘o Principe Filiberto ‘nù m’è piaciute pe’ niente, pe’ me chillo nun cantave… “arragliave”, ma, detto questo, ‘o principe hadda essere nu buòne guaglione, so ll’ate ca pe’ se mettere in mostra ‘o pompane ‘a rete. Stu princepe è malate ‘e Italianità e cheste me fà piacere, a fine re’ cunte è sempe italiano… anzi è figlio ‘e napulitane pecché ‘o pate è nato a Napule.
– Giritiè, ma chiste ‘a rete tene ‘na storia!
– Guagliù, lasciate a stà ‘a storia, pecchè ‘a storia chi ‘a conta ‘e ‘na manera e chi ‘a conta ‘e ‘n’ata! Si per esempio ‘a storia ‘a scrive ‘nu blasonato, (uno ch’è ancora malate ‘e fantasie, comme è ‘o marchese ‘e Totò) , allora chillo parle e scrive tutte ‘e ccose belle e positive ‘ra nubiltà: le grandi imprese, le conquiste, l’Albanìa, ‘a Tunisìa e via discorrente.
– Pecché Giritiè, nuje cunquistajeme tutte ‘sti tterre?
– E comme no?! Musullino! “Si sule ‘o addimmanne pare ‘e tremmà a mò pe’ tanno!” ‘O Rrè nuòsto, ‘o facette addiventà Imperatore ‘e l’Etiopia… ma jamme per ordine e grado.
Io sò ‘nnate sott’a dittatura fascista; nuje teneveme ‘o Rrè, Vittorio Emanuele III, e ‘o Duce, Benito Mussolini. Tutte ‘e llegge che faceve ‘o Guverno, ‘o Rrè ci aveva mettere ‘a firma soja: in realtà ‘o Rrè è comme si nun ce steve, cummannave tutte cose Musullino, tanto è ‘o vere ch’approvaje pure ‘a legge antisemita p’ò sterminio ‘e gli Ebrei, comme facettene ‘e tetesche ca criajene ‘e campe ‘e concentramente.

Castellammare

Castellammare

Musullino s’alleaje cu chillu pazzo ‘e Hitler e dichiarajene guerre ‘a Francia e all’Inghilterra e contre a nuje scennette pure ‘a ‘Mereca, e ve putite immagginà ‘e pertecate ch’avimme avute! ‘O principio jetteme a cunquistà ‘e popule pigliate ‘e famme pegge ‘e nuje, e a migliare accerettene a chella gente, penzate ca nuje steveme armate ‘e fucile, mitragliatrice e cannune, e chillillà stevene ancora armate cu lance e frecce! Chella gente erano cchiù pigliate ‘e famme ‘e nuje, ca Raffaele Viviani screvette dinte a ‘na poesia:

Nun bastava ‘a famma nosta
Ce vuleva pure ‘a vosta!

Doppe dichiarate guerra, l’Italia fuje invase r’e tetesche, e a nuje nun ce venette niscìune beneficio, anzi! Musullino ce rette ‘e tessere annonarie, ‘o pane 100 grammi ‘o juòrno ‘a salumerie, ‘nu pare ‘e chile ‘e paste ‘o mese, pe’ sine ‘e gravune… e pò ll’urdeme ‘a tutte ‘o pane l’avasciaie a 100 grammi ogne tre ghiuòrne!
– Giritiè, ma allore, ireve veramente pigliate ‘e famme!… E pecché cucinaveve cu ‘e gravune, ‘o gas nun ce steve?
– Guagliù, ma qualu gas… pe nuje ‘o gas ‘nu l’avevena ammendate ancora… nuje nun teneveme nemmene a luce elettrica, ausaveme ‘o cistarièlle, ‘a citilèa, ‘e cerogene… e pe cucinà ddoje fronne ‘e cavelisciure; ausaveme ‘a segatura dinte ‘a ‘na stagnera, sprocchele che jeveme a arrunà ‘ngoppe ‘e bosche. Cheste succedeve ‘e juòrne… ma ‘a notte avevema fà ‘a fuì sotte ‘e ricovere quanne sunave l’allarme, e quartiere nuòste, ‘o chignule, ‘a chiazza, ‘a caperrina, ce jevema ‘a riparà sotto ‘o tunnell r’a vesuviana ‘ngoppe ‘e binarie ‘ro treno… e nun ve rico, ca mane mane ‘o fieto c’assummave, ca pe quacchedune ca nun c’a faceva cchiù a cuntenè, e pisciave ‘nterra! …’e pullece, perucchie, pimmece… conviveveme cu tanta specie ‘e animale ca si ce penze me prore ancora pe’ tutte parte! ‘O scuro, ‘e bomme ca chiuvevane… ‘e contraerie a rinde ‘o cantiere ca sparavene… guagliù ve pozze assicurà ch’era ‘n’inferno!
Penzate ca na notte chiuvettene tanta prujettele ‘e murtaie, ca forse erene destinate ‘o cantiere ‘e coccherune, ce jette pure a segno, ca tutte ‘e chiosche ‘e ll’Acqua r”a Maronna fujene rase al suolo, e culpettene a tutte quante nunne scanzajene niscìune.
‘E ‘mericane lentamente avanzavene, se riceve ca stevene ‘a Sicilia, se riceve ch’avevene firmate l’armistizio, ca guèrre era fernute… ma qua’ fernute! E bomme continuavene a carè, ‘e tetesche se pigliavene tutte ll’uòmmene ch’erene restate… e chilli curnute ‘re fasciste revene ‘na mane a de truvà. Nuje nun sapeveme cchiù si ‘a uèrra era fernute o no.
Chilli povere surdate si jevene spuglianne p”a via… e ogne famiglia e nuje a Castièllammare teneveme tre o quatte surdate accuate, a rischie ‘e essere fucilate de’ tetesche: ce sparteveme ‘a miseria ‘nzième cu lloro pecché ‘e mamme nòste ricevene ch’erene tutte figlie ‘e mamme e comme ‘o faceveme nuje a ‘o sud, ‘o facevene pure a ‘o nord.
Tra tutte sti casine, cu tetesche che rastrellavene e sparavene a ogne suspette, e fasciste ca facevene abuso ‘e tutte e tipe, ‘e ‘mericane ca vuttavene ‘e bomme e lentamente avanzavene… ‘o ssapite ‘o rrè nuòste che facette?
– Che fàcette ‘o rrè nuòste Giritiè?
– Ecco la storia: ‘o rrè nuòste se pigliaje ‘a mugliera e ‘e figlie e se ne fujette comme e ‘nu mariuòlo e ce rummanette a nuje ‘mmièz’‘a tutte ‘e guaje. Mò! Tutte chello che v’haggio ritte io l’haggio vissute, nun l’haggio liggiute a nisciuna parte, e nun saccio ‘a storia ch’è scritto?
Continua…

Lascia un commento

Il tuo indirizzo email non sarà pubblicato. I campi obbligatori sono contrassegnati *