|
Guerra
e dopoguerra
(
II parte )
- Giritiè, ma po’ comme jette a fernì?
- E comme jette a fernì!... jette a fernì ca Castièllammare addiventaje vacande, nun ce steve cchiù niscìune…’na città
morta! Coccheruno ch’era rimaste ancora valide, e ch’era sfuggite ‘o rastrellamente ‘re tedesche e de fasciste, se ne fujètte ‘ngoppe ‘e ‘mmuntagne, ‘a parte ‘e ‘Gragnano, Agerola… rummanettene sule femmene, vecchie e guagliune. A maggior parte ‘re tedesche se ne jettene! Ma primme ca se ne jevene facettene terra bruciate ‘a rete a lloro: vuttajene ‘nfunne tutte ‘e bastemiènte ‘ca stevene dint’ò puòrte, barche, paranzièlle, pe sine ‘o Giulio Germanico, ‘o purtajene a rete puòrte penniello e ‘o vuttajene ‘nfunno! Appicciajene tutte ‘e fabbriche, ‘e muline, ‘e pastificie, ‘a fraveca ‘e Cirio nu mare ‘e zucchere abbruciate pe terre e nuje, incurante ‘e tutte ‘e pericule ‘e jeveme a saccheggià. Tutte ‘e ponte che stevene ‘ngoppe ‘o sciùmme ‘e facettene zumbà tutte in aria!...
‘A famme!...’a famme guagliù!...’a famme è ‘na brutta bestia, ce mangiaveme ‘e tutte, ‘e cavelisciure cu tutte ‘e fronne e ‘e ttorze, jeveme facenne ‘e cicorie selvatiche pe dinte ‘e binarie ‘ro treno…’e cardille a facce ‘e mmure! E cardille so chelli piante ‘ca crescene spontanie ‘cu ‘e sciure gialle, tutt’ore ‘e vveche ancora e me ricorde l’antica famma,… ‘e virze cu tutt’è torze, scorze ‘e pesielle, scorze ‘e fave, ‘e ppatane nunn’è mmunnaveme cchiù…quande se riuscive a ne capità cocche chile… eh sì, pecchè cocche femmene che s’azzardave a gghì ‘ncampagne e riuscive ‘e accattà sett’otte chile ‘e patane pe se ‘ne guaragnà cocche chile p’essa stessa, e spisse vote avevene ‘e fasciste ‘e facce e quande ‘e ‘ngucciavene cu ‘e patane ‘ngape, s’ ‘e pigliavene e po dicevene che li requisivano! Ma nunn’era overo, ‘e ppatane s’ ‘e purtavene ‘e ccase lloro!
- Giritiè!...e nisciune se ribellave sapenne po’, ca s’ ‘e purtavene a case sti ppatane?
- Se ribellavene!?... a chi? … ‘e fasciste?... seh! E stive frische!... Vuje avite ragione ‘e parlà accussì, pecchè nuje mò stamme in democrazie, ma vuje, ‘nu cunuscite che significa ‘a dittatura!... Chiunque se ribellave ‘o regime aveve ‘nu cuòfene ‘e palate e purghe ‘e uòglie ‘e ricine. Ma pure ‘e fasciste accummingiajene a scumparè: paricchie ‘e lloro cagnajene paese pecchè ‘e ‘nguacchie ‘n’avevene fatte troppe e tenevene paura ‘e coccherune ca se puteve vendicà… Ma jamme avante.
Nuje a Castièllammare ‘nù sapeveme ‘a uèrra si era fernute o nò! E vvote senteveme ‘e dicere ca ‘o NORD se cumbatteve ancore, po se senteve ‘e dicere ca ‘e mericane stevene arrivanne, dicevene che stevene a Salièrno, ma nuje ‘nu vereveme niènte e ‘nu sapeveme si ereme carne o si ereme pesce, sapeveme sule ca ereme pigliate’e famme, ‘e paura e chin’ ‘e perucchie!...
Finalmente venette ‘o juòrne ca veretteme ‘e primme Mericane, Spuntajene ro ponte ‘e Santu Marco ca venevene ‘a Salièrno; era ‘n’autocolonna ‘ e camion bùone equipaggiate e carreche ‘e vivere e surdate.
‘Nnanze a tutte stevene tre o quatte jeep scoperte cu quatte surdate ‘a rinde; tutte guaglione belli, gruòsse e sorridenti… mazzecavene ‘e caramelle a gomma e parlavene mièzo napulitano, mièzo italiano…insomma se facevene capì… a nuje ce chiammavene “paisà” ! Doppo scupriètteme ca chille erene figlie ‘e italiane emicrate in America. Quande passajene p’ ‘e strade noste spalangajene balcune e feneste, e tutte affacciate e salutavene cu ‘e llacreme alluòcchie, tutte chille ‘e pianterrene ascevene a dint’è vascie e s’abbracciavene e vasavene ‘e merìcane. Se chiagneve!....guagliù se chiagneve, se ‘mmiscajene lacreme, chiante e sorrise.
- Ma pecchè se chiagneve Giritiè?
- Pecchè ereme libere, ci avevene venute a liberà, erene ‘e liberatore nuòste, nunn’ereme cchiù schiave ‘re tedesche e de fasciste, ‘a ‘uèrra, era fernuta.
- Giritiè, accussì fernette tutte cose?
- Seh…era fernute tutte cose?! ‘A ‘uèrra era fernute ma ‘a famma nunn’era fernute ancora! A Castièllammare arrivajene pure ‘e nave, quanti nnave, nave ‘e uèrra e mercantile carreche ‘e bene ‘e Ddio. ‘O puòrte era chine, attraccate vicine ‘e banchine e in rada, quanta nave avevene rate fùnne in rada, ‘e zattarune jèvene e benevene a sott’e ‘nnave e sbarcavene ‘e surdate ‘nterre ‘a rena, certi zattarune cu ‘e rrote ‘e gomme a sotte comme ‘e camion ca camminavene pe mare e pe terre, nuje ‘e guardaveme e ‘nù me pareve overe, a centenare, a migliare erene ‘e surdate. Castièllammare se rignette, erene ‘e tutte razze: Americane, Australiane, Canadese, Sudamericane...’e nire, quanti nire e po ce stevene l’Inglese ca pure erene assaje. Nuje scugnizze tutte attuòrne a lloro ca ce reveme arafà pe ce rendere utile, l’aiutaveme a regnere e sacchetielle chine ‘e rene pe fà ‘e ttrincee, penzate ‘e ttrincee ‘mmièz’a villa ‘e rimpette ‘a cassa armonica e dinte ‘o viale Talamo, ‘mmièz’e platane costruèttene ‘nu deposito ‘e benzine e ‘a tanne sò muòrte tutte ‘e platane e ‘nù sò crisciute cchiù!
Guagliù , vuje state sule a sentì, facite parlà a me sulo. Si vulite fà cocche dumande, facitele. Chelle ca ve stò raccuntanne sò episodie ‘e uèrra ca io aggio vissute a Castièllammare, e sfido a chiunque ‘e me smentì... io sò ‘nu sopravvissuto ‘e chella maledetta uèrra.
- Giritiè, ma che t’avimme ‘a dumandà? Tu staje raccuntanne accussì bello e ‘nù te vulimme interrompere!
- Io ‘na cosa t’‘a vulesse addumandà.
- E parle Luigì, che me vuò dumandà?
- Ma quande venettene sti mericane, accummingiajene a ve dà coccose ‘e magnà?...
- Bella dumanda Luigi!... No!... ma ci arrangiaveme! Mi spiego: comme v’haggio ditte apprimme, ca ‘o mare nuòste era chin’e nave, dint’o puòrte e fore ‘o puòrte e tutte carreche ‘e bene ‘e Dio.
‘O puòrte nuòste, ch’è abbastanze gròsse, ‘o recintajene cu ‘e reticolate, accummincianne ‘a fore all’acqua ferrate, “l’entrate ‘re puònte franche” pe ce fà capì, sine ‘a banchina a du mò ce sta ‘o Muntillo ca primme nun ce steve ancora. A piazza Orologgio ce steve n’entrata grossa ca trasevene e ascevene ‘e camion cu doie sentinelle ‘e guardie pe nù fà trasì a nuje, “ma nuje traseveme ‘o stesso” ! E che ce steve ‘nterra ‘o puòrto: balle ‘e magnà ‘e tutte specie, scatele ‘e carne, ‘e sacicce, ‘e polle senz’ossa, latte condensate, casce ‘e sciùcculate... quanta sciùcculate chi l’aveva mai viste, pe sine ‘e maccarune dint’e scatele. Vestite, cazune, maglie, e ‘a pòvere?! ‘A pòvere ‘e òve, cu ‘nu cucchiare ‘e pòvere dint’a ‘na tièlla addiventave ‘nu filosce r’òve, pòvere ‘e pesièlle, pòvere ‘e fasule ca ‘nù sapeveme nemmene comme se faceve.
Tant’è ‘o vere, ca quande ‘o faceveme nuje ere salate comm’acchè, ma nuje ci ‘o magnaveme salate e bbuòne ca famme ca teneveme. Tutt’e scugnizze ci ammacchiavellaveme cu ‘e mericane, ‘e chiammaveme Johnny, pe nuje erene tutte Johnny... ”hey jò, bisinissi”e ce revene ‘e tutte: maglie, scarpe, cazùne, è inutile dicere ca nuje steveme spruvviste ‘e tutte cose, nuje steveme “angriste e annure” e ce serveve tutto.
Nù bastave tutte chelle c’aveveme sufferte e che suffreveme ancòra, se ce mettette pure ‘o Vesuvio: vuttaje tante ‘e chella cennere ca ‘o cielo addiventaje nire, ‘a cennere arrivaje ‘nzì ‘a Sicilia... cchiù sott’o Vesuvio chiuvettene lapille cucente e prète ‘e sett’otte chile all’une. ‘E gente pe copp’a llasteche cu ‘e pale ‘mmane a menà cennere ‘a vasce p’‘a paura ca se sfunnavene ‘e palazze. Aveveme arrivate ‘o 1944 quanne chiuvette ‘a cennere, chiuvette cchiù ‘e 10 centimetre ‘e cennere, e chelle pesave pure: se calmaje ‘a cennere e ‘o Vesuvio se mettette a vummecà lave ‘e fuòco, spicialmente ‘e sere, se verève ‘na grossa lava ‘e fuòco ch’accumminciave ‘a copp’a vocca ‘ro Vesuvio e scenneve sin’a mmare p’‘a Torre ‘o Grièco. ‘A tanne ‘o Vesuvio ha perze ‘a caratteristica soja... apprimme teneve ‘nu pennacchie ‘e fumme... e doppe stutate tutte cose ‘o Vesuvio nunn’ha fummate cchiù.
Guagliù, ma ch’ora songhe?! S’è fatt’orario, ‘o rieste ‘o cuntamme dimane, a stessa ora ‘ngopp’a stu marciappière.
Continua...
Dello
stesso autore:
'Ntiemp''e
'uèrra ( I parte )
|
